小麥寶出了黑魂版，如果我要買機，我撐硬黑魂啦！
道理好簡單，銀根短缺即考慮白色小麥寶，入場費$8600 有1.83Ghz / 60GB HD / ComboDrive，應付得起一萬元以上的話，中級版走中間路線，$10200 2.0Ghz / 60GB / SuperDrive，黑魂個 spec 一樣不過多 20GB HD ，都係比多千五蚊，比得起一萬蚊就唔好計較果一千幾百啦，慳埋都唔夠買部 iPod，咁梗係要買黑魂，形 d 丫嘛，有人出機甩青，個別事件姐，之前小白都有人試過甩青啦。部機買得貴，將來放二手個價都高 d 啦。
總之，一係就買最平的白色，一係買最貴的黑魂，唔好走無性格的中間路線呀。
P.S 根據我不科學的觀察，發覺本地 blogosphere 對小麥寶的報道不及出新 iPod 時多。
我部 iMac Core Duo 17″ 是 4 月 12 日落order 的，17 號就送得貨，估唔到佢原來是新鮮出廠！可惜回到家已被老公拆開，索唔到那股 “new-mac-smell”。
公仔箱套打鑼打鼓咁宣傳的重頭劇「熱情的沙漠」唔覺唔覺都睇左幾個星期，但我覺得套劇唔好睇兼且幾悶。
首先講劇情，我發覺套劇無乜 drive，迫力不足，只講兩家人的鬥爭，而各人又有各人的鬼胎，成日打來打去嘈來嘈去都唔知為乜！？之前的金枝慾孽和鐵血保鏢就不同了，金枝一班女人要爭寵，鐵血班麻甩佬要爭權，眾人目標一致，令觀眾想知最後邊個勝出。
演員方面，陳豪個角色都唔知做乜，佢出鏡唔係被人打鑊甘的話就係行行企企再唔係就打種，無乜用，而馬海倫呢個下人，好心蔡少芬就殺鬼左佢啦，成日講野腰心腰肺，怕咩被佢捉住痛腳喎，剷除佢一了百了，平日睇時裝劇都係咁架啦，話咁易就解決左，何況係無法無天的民初沙漠！？不過可能要保住蔡少芬個形像，唔可以奸到咁盡卦？計我話佢個角色如果搵鄧萃雯做就差唔多，起碼都奸 d 先啦。
而所講的地區特色，咩高地呀沙漠呀呢d 係就係有特色，不過唔係咩好靚的景色，唔可以當風情晝咁睇，而且差不多可以全廠景拍都得，個故事只需在一個民初偏遠地區發生就得，甚至乎可以是香港民初的新界添。
王賢誌飾演的閻萬天，呢個名乍聽似奸人惡霸多d，可惜個角色係窩囊廢，浪費了個咁奸的名。另外，如果有片商開拍「魔鬼警察」的話，請cast 雄風斗斗的黃德斌做魔警，佢個款都幾合適。
Dani California 個music video 好正！扮邊個似邊個。
我其實很怕聽到人說「X的興起，會取代傳統的Y」這類的結論。
原因就如陳生講過，很多時東西要互相生存才能活下來。
說話多多又quotable 的法國佬Jean-Louis_Gassée 比喻仲貼題抵死：
Many people have said that the home computer will be the death of camaraderie at the office…Following that argument to its logical conclusion, you might as well say that masturbation should take the market away from sex…
父親是蘋果日報明采版專欄作家高慧然的忠實讀者，現在明采改版，高小姐的專欄撒了，老爸知道後連報紙都轉埋，改買別的報紙，我家一向不看該報！突然轉口味，實在接受不了！老爸竟然覺得該報和蘋果的差不多，他還聲言買蘋果純粹是為了看高慧然的專欄，有無搞錯！？一份擁共同反共都一樣！？
可能是高小姐寫男女心態的文章慰藉了老爸的心靈，有見及此，寫了封電郵問高小姐有沒有別的專欄連載，她很快回覆了我，日後會在網上寫雜文，高小姐的支持者請多加支持。不過該網站設計仍處於90s 的notepad 打html 式設計，我已忍不住提意高小姐轉用wordpress 做CMS。
Update：昨晚妹妹說老爸看了幾天後終於覺得新報紙太多垃圾廣告，最後還是買生果日報。另外，高小姐回覆說網頁是她的讀者幫她做，現在讀者正籌備建一個搜孤的 blog，不知搜孤的 blog是怎模樣？
上星期四幫老闆 Y 在Apple Store 訂了15″ MacBook Pro (1.83Ghz)，RAM 插到 1 GB，今日送貨來電說六點前送到，Apple Store 的效率都幾快喎。仲快過訂 iPod。
