繼續回帶寫日記。

聖誕假期間行超級市場見此漢堡扒素，只要將呢包粉加牛奶，再同碎肉撈均就得，咁得意嘅野梗係買包返去試試。結果塊漢堡的洋蔥味同菇味十分濃郁，唔似食漢堡扒，結論是試過就算。

兩天假期，朗朗仔和我都有點不適，本來有兩個節目都要缺席，留在家中休養，落街買餸成為了唯一外出。這兩天三餐都在家解決，肚皮不單止可以吃到很充實，還可以做些自己喜歡的食物，不用等位不用迫，食完慢慢嘆杯茶或咖啡，真是最寫意不過。

星期六下午食明太子飯素撈白飯+poach egg，朗朗仔就食薯仔沙律。

晚餐本來想煮深夜食堂的日式薯仔燜肉，但天寒地凍，想有汁撈飯，見屋企還有奶油磚，所以煮了白汁蔬菜配煎雞扒。

假期在家，學製烹飪雜誌介紹的自製醬，有兩款味我特別喜歡，左邊是味噌芝麻醬，右邊是蕃茄醬，製作簡單，用已消毒的玻璃瓶裝好，放在雪櫃內，可放一個月。

味噌芝麻醬材料及製法如下：
味噌 250克
酒 二分一杯
白芝麻 5大匙
豉油 3大匙
砂糖 5大匙
麻油 2大匙

用酒慢慢落入味噌，將之溶解，然後倒入餘下材料，中火煮滾、滾3-4分，入玻璃瓶，放涼，入雪櫃。撈肉碎和做烏冬湯底一流！加辣油味道會似擔擔麵，因為有味噌襯底，味道比普遍的擔擔麵醇厚。

蕃茄醬材料及製法如下：
茄汁 一杯
洋蔥 一個
蒜蓉 1茶匙
薑蓉 1茶匙
雞精 1粒切碎
橄欖油 1大匙
蜜糖 4大匙
醋 1大匙
鹽 1茶匙
胡椒粉 少許

洋蔥切碎，用橄欖油炒香洋蔥碎、薑蓉、蒜蓉，中火滾5-6分鐘，倒入餘下材料，攪拌好，入玻璃瓶，放涼，入雪櫃。用來炒飯、做意粉汁，撈雞肉、蝦都一流。

早前冬冬往夏威夷旅遊，看到他們在當地吃午餐肉不止，還有一款夏威夷名物Spam Musubi，睇到未食都覺得好味道！去野餐整兩件大大件的spam musubi 應該夠飽了。

特集內容介紹素麵配菜，其中一個是當造的夏日時蔬，用來配意粉或飯亦可，煮法如下：

茄子蕃茄各一個，切一口大

汁：
薑蓉 一大匙
蒜蓉 半大匙
豆板醬 一大匙
茄汁 兩大匙
糖 一大匙
鹽 小半匙
蜜糖 一大匙

熱水 50ml

先炒香茄子，落汁滾一滾，再落蕃茄同熱水，合蓋中火滾二至五分鐘，熱或凍食皆可，食之前撈一大匙檸檬汁或醋味道更佳。

夏天熱到無胃口，唔食消暑開胃野唔得，屋企還有意粉存貨，煮了個開胃午餐：

煮意粉時滾埋墨魚丸，是節約能源良方！

然後將蕃茄、泡菜切碎；落少少鹽和一大匙麻油，重口味者可以落蒜泥同薑蓉少許，跟意粉撈勻，食得。

我懶，食麵前會剪幾下，夾時麵和配菜可一齊食入口，大滿足也。

延伸閱讀：焚風夜食2010

翌日跟網上找到的食譜搓批底，發酵一小時，發現失敗了，水落得過量，麵團是一pat 水，試第二次，個多小時後，勉強可以碌成批底，歡天喜地落料時發現，預備的材料太多，計有兩片菠蘿、半個青椒、三條腸仔、三條蟹柳、一個蕃茄，但批底太細，結果堆成小山放入焗爐焗。

材料都是易熟的食物，焗十五分鐘搞掂，不過個批底好硬，朗朗仔勉強食晒。

唉，要再找找批底的製法。

放完假，學校有個活動是「水果日 + 慶祝母親節」，我負責帶清蛋糕一個回校，那朝早早半小時焗蛋糕，指示說180 度焗二十分鐘，焗完篤篤中央見熟，施施然食早餐換衫化妝，出門口前批走面頭一小部份，赫然發現側邊有一忽唔熟！！！再焗多一會都唔ok，已經夠鐘出門口了，急得一邊扯頭髮一邊問朗朗仔點算好？

朗朗仔話微波爐叮，結果叮兩分鐘熟左就算。趕到學校，去幫忙洗水果，轉頭看到蛋糕被切去四邊，中間切開兩排四方形的．．．唉，早知就焗長方形啦。圓形蛋糕點會切方塊架！？

左邊是朗朗砌給我的水果蛋糕，右邊件夾心水果蛋糕是朗朗自己的。

在家做壽司，細卷易整，而且可以一齊整，所以只做了細卷。

朗朗仔問：「屋企無迴旋帶喎！」
「有呀！」我指著他的火車玩具。

食完後朗朗仔問點解唔整蛋壽司，佢的意思是上面有件蛋，下面有飯，再用紫菜包住果ｄ。

朗朗仔覺得好好玩，也食了不少。實情是，雖然味道沒問題，但煲飯用泰國米煮，即使浸了一小時，也焗了十五分鐘，食落口還是不及壽司店的製品糯口，給爹爹一件，反應：「好難食！！」

所以話呢，朗朗仔好抵鍚，「好難食」的壽司都食得津津有味！

因為爹爹的反應，心裡硬是想要煮出令爹爹都讚的壽司！

爹爹一邊食一邊搖搖頭，朗朗仔食到最尾話：「媽咪，呢碟飯好難食呀！YUCK！」

這是朗朗仔首次將英語學以致用，為娘的既開心又好嬲，甚是無奈。

蘑菇蕃茄雞肉餅飯，一定會再挑戰！下次塊肉餅改用漢堡扒方法調味，煮法改為煎，應該會大大改善。

應承過朗朗仔，一旦無咳就整甜品，所以整了想食好耐的朱古力，婦女雜誌教用現成的hotcake mix 焗蛋糕，因為有味之餘又快熟，用微波爐叮或用多士爐焗已ok，以下是「半熟朱古力」的做法，六人份量：

材料：
朱古力100g，切碎備用
Hotcake 粉60g (大概是五大匙左右)
砂糖 60g (大概是五大匙左右，嫌多可以減半)
雞蛋兩隻，蛋白蛋黃分開備用
牛油 30g

做法：
1. 朱古力和牛油用保鮮紙包好，微波爐叮2 分鐘
2. 叮好後落一半砂糖，撈勻，再落蛋黃
3. 蛋白落砂糖打至泡沫
4. 落一半已打起的蛋白
5. 逐少逐少落Hotcake 粉，繼續撈
6. 最後將另一半蛋白撈落去

每個小碗倒一半份量，微波爐叮1 分10 – 20 秒左。或用錫紙封好，用平底鑊浸水，小火蒸15 分鐘。

續上文。

上文的暖豆腐煮法簡單，還有幾個食法，做法多了少少。

Carbonara風暖豆腐：

豆腐 2分1 磚
豆奶150 ml
薄切薑一片
芝士半片
鹽少許

所有材料微波爐叮1 分鐘，加入打好的雞蛋一隻，再叮1 分30 秒。

豆奶紅豆暖豆腐：

豆腐 2分1 磚
豆奶150 ml
薄切薑一片

微波爐叮2 分鐘，加現成的日式紅豆蓉，也可落些少蜜糖或砂糖調味。

昨晚跳完舞的宵夜。

睇日本婦女雜誌介紹以豆腐當飯，食法是三餐之中，其中一餐食豆腐，原理是豆腐低卡路里，又有營養，最重要是夠「飽肚」，當然，要減磅的話，配菜不能大魚大肉，只配些簡單的，食落有味不會口淡淡的配料。

做法如下：
軟豆腐一磚
水 or 豆奶 150ml
微波爐叮兩分鐘

自選配料：飯素、麵豉、蠔油、麻油、泡菜、蔥花、榨菜、蝦米等等，用來送粥的配菜。

要食粥又嫌煲咁煩，食豆腐都唔錯。

自從在日本食過漢堡扒之後，就再沒有食過了…前日很想食漢堡扒，翻開雜誌，造法很簡單，以下是四人份：

碎牛肉300G
麵包碎一杯
二分一個洋蔥，砌碎
蛋黃醬一大匙 (或用奶精兩個代替)
豉油一大匙
雞蛋一隻，打散

因為朗朗仔硬是要入廚幫手，將所有材料倒入膠袋，挷好後交給他任”揸”任”鏈”，務求攪拌均勻又不要弄到四圍都係，經過多次鼓勵，朗朗仔總算把肉團搓得很均勻。

搓好肉，煮咖哩汁要磨蓉的功夫也交給他，總之要企定定又要重覆動作的功夫都由他做。

搓好的肉團像泥膠，很容易搓出扒狀，中間用手指按凹，煎的時候一邊用大火煎好，翻過另一面用小火合上蓋慢煎。因為配咖哩飯，所以不用另煮汁，懶人嘛。

總結經驗：朗朗仔的份量應一分為二，爹爹的份量要多一點，唔需要咁厚，易ｄ入口。

幾個月前見小冬甩模，當下已經很想買下來！日前又見到它，唉！死就死！買回來玩下。搓粉的份量是亂落，加牛奶加牛油，叮的時間都是亂來，看叮出來的樣子還可以。

可惜叮得太耐，成品硬如岩石。半數以上被朗朗仔鯨吞，咁難食都照啃，好孝順！

模具是silicon 膠，好處是叮得焗得又雪得，懶開焗爐用微波爐叮蛋糕 / 格仔餅甚方便。

煮了多次碟頭飯，呢次成品終於色香味俱備。

這篇文是日式碟頭飯的修正版，上文提到怒煲蔬菜半小時可迫出甜味，唯缺點是煮不出像熬過夜的濃郁咖喱，看日本煮食節目，學會了速成方法，如下：

蔬菜材料照舊：
薯仔一個
紅蘿蔔一條
洋蔥一個

改良之處在於：洗淨去皮後拿走四分之一生磨成蓉，其餘照舊砌粒，然後一舉怒煲半小時，磨蓉一來可將蔬菜的甜味發揮到極致，二來也會煮出濃稠的咖哩汁。

打開煲見蔬菜濃湯，豈止幸福的味道，簡直是令人心跳加速的愛的呼喚！