8
Oct
星期日帶朗朗仔去同阿靛和藍藍玩。不停打波同玩車車。朗朗仔仲要餵飯，只有心情靚或急住食時才自己食飯，好唔掂囉，咁大個仔！
昨日重陽節假期，一齊去太原街買 或睇玩具，爹爹想買大武士，對爹爹的嗜好多年來一直採用積極不干預政策，買多買少從不過問，等「市場自動調節」。但朗朗仔年紀細，車車 幾乎係 失控咁買，所以採用較為柔和的干預政策，例如曉以大義，效果尚算成功，只要我在場，即使去玩具反斗城及各大百貨公司都可以全身而退，因為朗朗仔知道媽咪不是敲詐對像，可惜從來無人知，亦無人理。
朗朗仔已經熟知太原街是一個巨大的車庫，上次同婆婆路過識得帶婆婆入去買車車，今次有順得人爹爹陪同之下，以為可以買，結果遭媽咪強權干預，朗朗仔抱住盒車車在店內大哭，爹爹見情況膠著於是行去第二間鋪頭，朗朗仔喊住叫「爹爹呀！爹爹呀！買車車買車車！要果個！要果個！」喊了一輪才肯放下車車，要去搵爹爹。
爹爹見朗朗仔無得玩具，加上維權不果，於心不忍，陪朗朗仔唔買玩具，爹爹話唔想朗朗仔睇住佢玩新具，又話兩父子要一條心咁話喎。
* * *
今日返學，Chole 如常地來到我們面前打招呼，離開時請她幫我照顧朗朗仔，她點點頭。
02:41 on October 9th, 2008
下次唔買玩具俾朗仔,就不如唔好去太原街,果晚朗哭左三次,到今朝一見我仲講 爹爹 冇買車車 冇買車車. 嘇! 兩父子放假都唔開心…….
11:55 on October 9th, 2008
@爹爹: 佢呢句說話係有人教。佢只係扭計喊，又唔係無得食飯，有幾慘？
13:31 on October 9th, 2008
藍藍果日成日猴住朗朗仔架黃色校巴,街上見到校巴係咁叫我睇,攤開雙手話自己無,終於佢老爹買左比佢!天下爹爹一樣黑……
17:19 on October 9th, 2008
睇黎呢, 必必係好遲熟(春虫虫?)囉. 佢未識扭買野, 只會要求”行”超市囉. 同埋, 佢對車興趣都麻麻, 最中意都係打波(羽毛乒乓), 無得同朗朗藍藍鍊車勒.
18:02 on October 9th, 2008
@藍mama: 哈哈，如果無校巴，咁買一架無問題嘅，不過就唔好學朗朗仔咁重覆咁買，買完又買。
@怒火眼睛: 唔係春虫虫的問題，而係必必身邊有無黃大仙陪出入？朗朗仔身邊有唔止一個黃大仙…
19:57 on October 9th, 2008
＞下次唔買玩具俾朗仔,就不如唔好去太原街
呢個唔係好辦法，要訓練一下小朋友睇唔一定要買，做父毋要強硬 d 要做衰人
不過家家有本難唸的經，波記行玩具鋪可以睇下就算，但就永不就「飯」！次次食飯都好似開片講數咁！
23:05 on October 9th, 2008
男仔都係自動波鐘意玩車…
我都有俾毛公仔如kitty,pooh等天天玩,但都不及車咁積極!!
23:59 on October 9th, 2008
今次情況有D唔同,唔係平日行過吉吉島扭買車, 而係大家一齊去太原街買玩具(停車場),朗仔連玩具都簡好,去到門口至話唔買, 係人都喊la. 去到日本outlet 至話唔俾你買衫, 去到峰壽司至話唔俾你食帶子,你都唔開心la. 同”訓練一下小朋友睇唔一定要買”或”黃大仙”根本無關. 未出門口前我已話想買個停車場俾朗, 最後我冇買係尊重你,希望你明白.
00:34 on October 10th, 2008
@爹爹: 兩樣野囉，一、出門無講過話買玩具比BB，二、係你話買停車場but BB 話買車車。同埋好多謝你尊重我。哎呀，爹爹留言反駁，禾巧京京，禾下次唔干預你地買玩具的活動，放假去買玩具比你地啦。