28
Feb
昨晚放工回家，見朗朗仔沒精打采兩眼腫腫的在看電視，嫲嫲說朗朗脾氣很壞，整天在發脾氣，事緣朗朗跟婆婆及同事們飲茶，朗朗掉東西時被同檯的姐姐們取笑，臉皮薄的朗朗當場大哭起來，更嬲了婆婆，之後扭婆婆買車車時又發脾四，回到家睡覺，醒後又大哭起來，嫲嫲帶朗朗出街，明明拿著的士出去，在大堂又要回家拿巴士，申時的士酉時巴士，如是者嫲嫲被耍了好幾轉。
大人們太遷就朗朗，使他變了頭不知足的怪獸，大人們都怕了這頭怪獸，要甚麼「生炒素球」(出自豹隱江湖的PK_兄) 一一滿足，大人們很愛朗朗，以為萬般遷就就是愛，忘了分辨是非也是愛的表現之一，我很明白，看著孩子笑嘻嘻的實在是甜上心頭，可是這笑嘻嘻的臉也是迷藥，過量會鬼迷心竅，本來的約法三章忘得一乾二淨。
你這頭小怪獸，媽咪都無晒符。
17:31 on February 28th, 2008
我家公子都被老師投訴脾氣壞！他是爺爺嫲嫲公公婆婆的第一粒孫，可想而知他是如何的萬千寵愛在一身．真係只可以歎句”無晒符”?
22:39 on February 28th, 2008
唉……真係唔縱得……俾仔玩死呀我都！
23:07 on February 28th, 2008
止蝕就止蝕，底線就底線，冇得心軟…….一係就依家痛苦，一係就將來痛苦，To be not to be, that’s the question.
09:34 on February 29th, 2008
有d零碎既ideas
會唔會出緊新牙仔，皮4差d？
步向兩歲係要學discipline，比d耐性，頑皮係正常既。
唔可以讓步係故言之，不過糾纏僵持都唔係解決方案，呢個階段小朋友如果搵岩對象扭計，扭計既毅力同耐力，比跑馬拉松既人更利害。（小弟好記性，尤記得好細果陣，老媽去鄰居度傾計，無帶小弟去，小弟隔住鐵閘喊足個幾鐘，由佢出門到返來為止！）
橋唔怕舊，最緊要受，用人用物用處境既改變（例如行開，第三者加入…），來係發皮4之前／初段，盡快轉移注意力，採取preemptive action先得。少d去街都係辦法，飲茶大人坐幾耐都無問題，小朋友真係悶到抽根架（小弟記得細個都有咁既感覺）。至於扭買野，最好係少行街／商場，去超市就幾好，學生果名，食物名。帶小朋友就咁帶住唔得架，佢地既注意力就會亂掃，要不斷engage佢地，manage佢地既attention.
小朋友的確係揀人來蝦，所以身邊親人扮演不同忠奸角色都唔係唔好。親媽媽，咁唔乖就爸爸／姐姐抱之類，work架，不過已經發爛左就唔得，都係要先發制人。
祖父母輩照顧係容易d寵壞，老人家後生對自己仔女就嚴格，老左對孫仔孫女又會好痛錫，個個都係咁。可以諗諗第時報全日既prenursery, k1。係唔係幾理想，不過要搵食，無法。
亂up一通，小小意見，多多包涵。
12:34 on February 29th, 2008
Amy, 但係花仔平日返學, 跟你地的時間多過跟坐四大長者喎, 影響唔及我呢邊咁大, 朗朗仔日頭跟住兩老成個大王咁要風得風,好離譜。
娜姐: 你都比仔玩!? 唔似喎
T, 我從來唔心軟架.
PK_兄: 佢就真係比你講中, 只係蝦其他人, 假期跟我無咁扭, 飲茶時就真係會扭下去街, 就算同佢去街都唔會叫我地買野. 係佢點到阿嫲阿婆四圍走. 不過讀全日都唔錯, 有得諗, 等佢獨立少少都好.
14:02 on February 29th, 2008
讀全日真係幾好架, 可以學識好多野, 又可俾佢知道自己唔係大晒! 有人覺得全日學校只係食多一餐訓多一覺, 無乜用. 其實就係呢d活動學得最多野.
小兒脾氣都幾好, 只係識蝦麻麻.
14:16 on February 29th, 2008
少子化下的哀歌，少子化再加上老人家少孫化，哀上加悲。
注意一下其情緒，成日發脾4是會成為習慣和手段的。最好送孩子多往有其他孩子玩耍的地方比較好，他在一堆孩童中便失去了那種十大以小為尊的情況，不再是核心，亦即是再沒有特別，他心情心性便會回到正常水平，跟孩童追追玩玩，身心不再扭曲一味在耍脾4。
愛可以千萬別成溺，大人必須有共識。否則越來越難教，先天是有性格，後天看周遭影響。
我未可以幫你手，起碼4-5先至可以來給予調教調教，現代的孩子是很少爺化的。暈
02:21 on March 1st, 2008
小朋友六歲之前都喺好可愛，六歲之後就想殺咗佢。
11:42 on March 1st, 2008
地下A 室：現在正積極考慮讀全日學校，區內有所不錯的。
園主：有架，現時有比佢同其他小朋友玩，雖有爭玩具，不過不傷和氣的，睇住班小犬追逐，都幾得意。老人家個口就好硬，心就好軟，呢樣野都幾惡頂！
MacMad：我聽果個版本話四年級前是天使，之後是魔鬼。
00:40 on March 2nd, 2008
我地搬屋前”慧妍雅集”都收左栩栩,但因要搬所以放棄左,參觀時感覺良好,又大又光猛,應該唔錯。