29
Mar
H & M 進攻香港之際，土炮Bossini 宣佈出孕婦裝同嬰兒衫，奶奶從廣告上看中紅白色的短袖夾衣，放工去看看，個款幾得意，質地又唔錯，短袖夾衣都只係$99，忍不住手買了兩件。
另外孕婦裝的款也不錯，有「正常款」的牛仔褲，肚位是彈性棉布，可穿至third trimester，同Jshoppers 賣的差不多，只是沒有褲袋，為甚麼要刻意標榜它是正常款？在我懷孕期間，市面的孕婦牛仔褲款式極之恐怖，車線是粉紅色的，後褲袋是心型的，最嘔心是褲腳位開叉兼有蝴蝶結，設計核突不止，最差就是功能，只得褲頭帶可調教，廣東話話明「大肚」，怎可以只預留腰的空位呢？這種褲大概連second trimester 也挨不過，價錢還要三四百元，同搶沒分別。
講回正題，上衣有tee 和polo 恤，款夠簡單，不會娘爆花花print 加蝴蝶結兼圓領，但如果在腋下位子車多個口做埋哺乳衣就好了，起碼產後都可以著，件衫的價值也會提高。希望將來會有啦。
香港終於都有間服裝鏈鎖店肯肩負以平價造出款式同質素都ok 呢個責任，日後孕婦想打扮得正常一點示人有得選擇，Bossini 抵讚！
11:54 on March 29th, 2007
出bb衫都未感動到我, 衫仔細細$99其實邊算平丫, 但出正常大肚衫, 噢, 感激! 我一路無著大肚衫, 係到左八個月, 肚真係鑼咁大逼住要買, 媽媽世界果d 幾百蚊件但又老土到癲, 幾乎令人產前抑鬱. 唉.
12:30 on March 29th, 2007
jshopper剛剛有免郵費的優惠，期限只去到明早而已！
17:23 on March 29th, 2007
我都睇過呀,但我覺得佢賣$99一件bb衫,略貴!!可能我娘家住元朗,元朗賣d衫真係好抵,$20一件夾衣咋,仲係純棉,個款ok架!!
19:01 on March 29th, 2007
媽媽世界d大肚衫真係完全唔掂,其實好多大肚衫都唔得,又貴又醜,好在大肚時興d闊身衫裙,唔駛買大肚衫著.:p
bossini d 衭仔ok嗎?好多衭仔d橡筋比較緊,會箍住個肚仔.
00:21 on March 30th, 2007
哎呀，BB 衫有牌子四圍都買到喎，同Hallmark babies、瑪莎、Mothercare 比算平啦。褲仔無留意，不過朗朗的褲也有點緊，著得多會鬆吧！？
媽媽世界簡直是經典，我都唔明設計師諗乜，那些衫穿上身有如大人扮細路女，一般時代女性怎會成身花花同蝴蝶結出街，都做人媽咪了，難道要返老還童扮cute？莫明奇妙！
我五個月時去左轉東京，買了些無印良品孕婦裝，平過媽媽世界少少，之後在Jshoppers 買了少少，又託網友在美國帶一點回來，無辦法，我實在忍唔到無得扮靚！！！
不過，現在倒是沒心機扮靚，妝也不願化，出街也只看BB 野。我想你們都是這樣吧？