PK 兄的留言，使我不吐不快。
復工初期，某位同事知道我在洗手間泵奶，他問我：「其實你頂得順廁所的衛生環境嗎？因為嬰兒食具要以沸水明火烚五分鐘才可以用，既然衛生要求那麼高，洗手間卻又是細菌滋生的地方，你接受到嗎？」
我的答案固然是接受不來啦，畢竟那個是用作排泄 / 吸煙的地方，若可供選擇，洗手間would be the last place on earth 給我用作泵奶，但我面對的困境是「選無可選」，咁點喎？唔通唔泵咩！？講一個好多人唔知的fact (真係連餵緊人奶的媽咪都唔知)，當奶量供應穩定，大腦會定時定候分泌乳汁，如上班時間內唔泵，谷到實一實的話，大腦會慢慢調節生產線，奶量會減少，少到甚至連早晚埋身餵都唔夠比BB 食。再講一個好多人唔知的fact (真係連餵緊人奶的媽咪都唔知)，就係餵人奶係有需求先有供求，之所以BB 出生後第一個小時內要餵奶，之所以頭一個星期隔兩小時餵一次奶，之所以要上班時間內泵奶，之所以可以餵到natural wean，就係咁解。
平心而論，女洗手間的使用量甚低 (女性員工少)，理應較乾淨，而且每次我使用前會稍作清潔現場，所有工具以乾淨的食物盒或密實袋袋好，而奶泵用後會消毒過才再用，加上事前洗手，所以都ok 接受到在洗手間內泵奶。
不過，應該是說一向有人會在洗手間內吸煙，這個人很沒有吸煙禮義，她會將煙灰會彈落洗手盤and then 置之不理，而兇手是誰，不需要以爺爺的名義立誓也可以猜中，因為只有一名女性吸煙者，我接受到有人在洗手間內吸煙，但我接受不到「將煙灰會彈落洗手盤and then 置之不理要由下一手大部份時間來說是我來清潔」，現在正煩有甚麼方法請她不要那樣做。
* * *
近日看到有些奶媽說政府在推廣母乳餵哺的力度不足，如公共設施沒有育嬰室等，這些point 我是同意的，論到私人商場等，無當然要罵，不過常說政府唔做呢樣唔做果樣，把所有責任都推到政府身上，我卻帶點保留，作為母親爭取子女在一個較佳的環境進食之權利，我們亦要出一分力，平和的手法可投訴該私人商場的設施不足，激一點又引來報導的，可以遊行訓街抬棺材，下下都靠政府，我真係覺得有問題囉。
01:10 on October 31st, 2006
先處理當前的難題，你不如在洗手間貼一張：「請於洗手間內吸煙後處置煙灰」吧，用電腦打印，大大張貼在牆上，看看有沒有改善餘地，不然，就去管理處投訴她的惡行吧。
長遠而言，是不是只有做一些「見報」的行動，才能喚起關注，令媽媽們不用再屈在洗手間內泵奶呢？
我真係唔想見到媽媽們學長毛抬棺材。傳統的爭取方法，是你們聯合起來寫請願信給各大商場，可能跟管理公司代表弄張遞信握手相，當然要通知傳媒採訪．．．．．．
我只是菜鳥小記一名。以最近傳媒當blogger係未開發的新大陸而言，可能你們弄個快閃餵母乳（「快閃」是不是已經out咗？）、或者在網上發動blogger起義，在blog右上角掛上絲黃之類，可能比較有新聞性，比較多人關注也不定。
但大型商場及辦公室會不會真的肯弄個房間給偉大的媽媽們，當然又是另一回事了。
09:47 on October 31st, 2006
公司層面, 都可以做d野, 例如比需要泵奶既女同事係無會開既時候用 conference room; 或者office大既, 暫時將某些位置闢作比有需要既同事泵奶用.
抵得諗既小公司老細甚至可以出去做野既時候, 或者有需要既時候行一行開飲杯咖啡, 讓間房比同事泵奶, 電話線可以飛, 用第個機頭一樣可以login番自己個account, 坐開一陣完全workable (當然, 自尊就是一切, 同員工講野大家企定坐都介意果d動不動處於自悲邊緣既老細, 咁做就相當困難!)
有幾何有好多同事要泵奶呀! 些少arranegment, 比倒其他同事既印象, 彰顯一種 compassionate management 既 values, 對於培養同事歸屬感, 可謂無價.
12:02 on November 1st, 2006
diana：謝謝你的意見，我會試試看。有關爭取權利的方法，單靠我一人辦不來的，可是我沒有同我一樣處境的盟友…
PK 兄：咁老實講我老闆同我講用幾多時間泵奶無所謂都得已經很滿足了，礙於公司地理環境所限，洗手間終始是最合適的地方. 但你所提到的方法，真係有幾多香港上司會做到！？
19:27 on November 1st, 2006
雖然我唔係餵全人奶,但如果你發起爭取,支持你o咼！
09:32 on November 5th, 2006
好欣賞你的堅持,
努力呀!