16
May
公仔箱套打鑼打鼓咁宣傳的重頭劇「熱情的沙漠」唔覺唔覺都睇左幾個星期，但我覺得套劇唔好睇兼且幾悶。
首先講劇情，我發覺套劇無乜 drive，迫力不足，只講兩家人的鬥爭，而各人又有各人的鬼胎，成日打來打去嘈來嘈去都唔知為乜！？之前的金枝慾孽和鐵血保鏢就不同了，金枝一班女人要爭寵，鐵血班麻甩佬要爭權，眾人目標一致，令觀眾想知最後邊個勝出。
演員方面，陳豪個角色都唔知做乜，佢出鏡唔係被人打鑊甘的話就係行行企企再唔係就打種，無乜用，而馬海倫呢個下人，好心蔡少芬就殺鬼左佢啦，成日講野腰心腰肺，怕咩被佢捉住痛腳喎，剷除佢一了百了，平日睇時裝劇都係咁架啦，話咁易就解決左，何況係無法無天的民初沙漠！？不過可能要保住蔡少芬個形像，唔可以奸到咁盡卦？計我話佢個角色如果搵鄧萃雯做就差唔多，起碼都奸 d 先啦。
而所講的地區特色，咩高地呀沙漠呀呢d 係就係有特色，不過唔係咩好靚的景色，唔可以當風情晝咁睇，而且差不多可以全廠景拍都得，個故事只需在一個民初偏遠地區發生就得，甚至乎可以是香港民初的新界添。
王賢誌飾演的閻萬天，呢個名乍聽似奸人惡霸多d，可惜個角色係窩囊廢，浪費了個咁奸的名。另外，如果有片商開拍「魔鬼警察」的話，請cast 雄風斗斗的黃德斌做魔警，佢個款都幾合適。
16:52 on May 16th, 2006
係lor，依套黃土地加菊豆加老井既怪劇，真係不明所以，小弟唯有轉睇Now TV…..
17:06 on May 16th, 2006
遲D仲有陳曉東做既賤女優魂,睇黎公仔箱不停發動恐怖襲擊,布殊要介入啦!
18:05 on May 16th, 2006
我反而有d 興趣睇下深夜首播的倉底劇係咩貨色.
18:14 on May 16th, 2006
王喜樣擔綱演出,肯定係安史之亂時拍落的
01:18 on May 17th, 2006
我諗我頂唔順佘小姐d無乜0既戲多d!
17:04 on May 17th, 2006
係呀, 成個劇無乜邊個做戲好睇都係致命點之一.